Página 1 de 6 PREGO DE CONDICIÓNS TÉCNICAS QUE HA REXER A LICITACIÓN DA PRESTACIÓN DO SERVIZO DE XESTIÓN DO PROGRAMA EDUCATIVO MUNICIPAL BOLSAS USA 16-17 E BOLSAS USA 17-18 IMPORTE 400.000,00 (IVE EXENTO) 1.- Obxecto: Organización e xestión do programa educativo municipal "A CORUÑA NO MUNDO: BOLSAS USA 16-17" e "A CORUÑA NO MUNDO: BOLSAS USA 17-18", no que se ofrece a oportunidade ao alumnado de 4º da ESO matriculado en centros sostidos con fondos públicos que imparten educación secundaria obrigatoria no termo municipal, de cursar o Grao 11 nos EEUU, equivalente a 1º de bacharelato, así como de adquirir un dominio avanzado da lingua inglesa e un coñecemento real da vida e a cultura norteamericanas. 2.- Obrigacións do prestador do servizo: O prestador do servizo será responsable de: a) Organizar e realizar, nas datas que estableza o Servizo Municipal de Educación (SME), xornadas de información e preparación sobre as características deste programa para o alumnado participante e as súas familias. b) Preparación do dossier para o seu envío á administración americana e asesorar ás familias no proceso. c) Reunirse, cando menos unha vez ao mes, co responsable do programa no SME para informar do desenvolvemento do mesmo. d) Preparación, realización e avaliación da proba de inglés que terán que facer os/as solicitantes do programa. e) Establecer a relación contractual necesaria con algunha das axencias ou compañías recoñecidas polo Goberno Norteamericano para xestionar o programa federal de estancia do alumnado estranxeiro en High School públicos. f) Responsabilizarse da selección do High School público e da localidade para cada participante de acordo coas seguintes condicións: O High School garantirá unha calidade contrastada na súa educación e ensino así como un clima pacífico de convivencia entre o alumnado, as familias e o profesorado. Estarán situados en localidades historicamente exentas de risco de violencia social e escolar. 1
Página 2 de 6 g) Seleccionar a cada unha das familias de acollida e acordar con cada unha delas as condicións da estancia do participante asignado mentres dure o seu tempo de permanencia en USA. Esta selección será realizada baixo as seguintes condicións: A familia de acollida estará legalmente constituída e, preferentemente, terán algún fillo/a de idade similar á do participante que acolla. A familia de acollida deberá acreditar unha ética e un comportamento moral recoñecidos e aceptados pola comunidade na que residan. A familia de acollida deberá responsabilizarse dunha atención permanente e dilixente ante as necesidades habituais na vida do participante, tanto desde o punto de vista afectivo como material, e nun réxime de pensión completa. A familia de acollida deberá garantir e respectar a liberdade relixiosa do participante. h) O prestador do servizo supervisará o proceso de adaptación dos participantes nos fogares nos que sexan acomodados, mediante visitas mensuais do profesional responsable contratado para a xestión do programa. En consecuencia, cada participante terá asignado un titor responsable coas seguintes funcións: Organizar a chegada e recepción do participante á localidade de destino en USA e á familia norteamericana correspondente, así como a súa despedida e volta a España, garantindo en todo momento a súa seguridade persoal. Supervisar a vida persoal, familiar e social do participante. Supervisar o seu rendemento académico e evolución escolar. Orientar, asesorar e intervir na resolución dos seus conflitos persoais, familiares, sociais e académicos. Informar puntual e dilixentemente ao prestador do servizo sobre estes aspectos. i) No caso de se producir algún conflito de convivencia entre o participante e a familia de acollida ou no High School, o prestador do servizo deberá facer un seguimento puntual das accións do titor e adoptar a decisión correspondente de común acordo co participante e a súa familia. En todo este proceso, o prestador do servizo manterá en permanente estado de información ao SME e á familia de orixe do participante. j) O prestador do servizo esixirá ao titor o cambio dunha familia de acollida a outra nos supostos en que o participante: Sufra algunha situación de violencia contra a súa integridade física ou psíquica. Sexa testemuña dunha situación similar entre membros da familia de acollida. Este inmerso nun contexto familiar, educativo ou social que a xuízo do seu titor e de acordo co prestador do servizo, puidese pór en risco a consecución dos obxectivos formativos, tanto persoais como académicos, que este programa establece. 2
Página 3 de 6 k) Organizar e pagar as viaxes de ida e volta de cada participante desde A Coruña até as súas localidades de destino en USA, garantindo en todo momento a seguridade do participante así como a entrega e recibimento por parte da familia de acollida e de orixe respectivamente. l) No caso de que un participante decidise abandonar o programa por calquera razón, antes da finalización do curso académico en USA, o abono do billete de volta correrá ao seu cargo. No entanto, o prestador do servizo organizará a súa viaxe de volta completa garantíndolle a súa seguridade durante o tempo de duración do mesmo e a entrega á súa familia de orixe. m) Tramitación e obtención de visados e permisos de entrada e estancia en USA para o tempo establecido neste programa. Esta obriga inclúe: Establecer e organizar a cita dos participantes na embaixada norteamericana. Aboar as taxas por expedición dos documentos prescritivos. Organizar, facer acompañamento e asumir o gasto do traslado e estancia dos participantes para realizar esta xestión. n) O prestador do servizo garantirá a asistencia sanitaria adecuada fóra do territorio español así como a cobertura dun seguro de responsabilidade civil a cada un dos participantes neste programa. o) O prestador do servizo tramitará e obterá da Administración competente as solicitudes de validación dos estudos superados polos participantes en USA, unha vez finalizado o curso académico e previa a presentación en prazo da documentación necesaria por parte dos mesmos. p) O prestador do servizo disporá de, polo menos, unha persoa de contacto na cidade da Coruña que establecerá unha comunicación permanente co SME nos termos establecidos por este servizo. q) En toda a documentación editada e publicada en calquera medio de comunicación polo prestador do servizo, así como a entregada aos participantes, familias de orixe e acollida e, se fose o caso, á entidade ou persoa responsable do seguimento do programa en USA, constarán os logotipos que se facilitarán desde o SME así como o lugar onde serán colocados previo acordo co prestador do servizo. r) Recadar dos titulares das prazas de bolsa parcial a porcentaxe que se indica na táboa que figura de seguido. O importe que recade por riba do 10% será descontado na primeira factura que se emita ao Concello. 3
Página 4 de 6 Renda per cápita anual Achega das familias < 8.387,15 10%* 8.387,15-10.250,94 20% 10.250,95-12.114.73 30% 12.114.74-13.978.52 40% >13.978.52 50% * Non afecta aos beneficiarios de bolsa total. Para o cálculo da renda per cápita anual o Servizo Municipal de Educación operará do seguinte xeito: 1. A renda familiar para os efectos de bolsa ou axuda obterase por agregación das rendas de cada un dos membros computables da familia que obteñan ingresos de calquera natureza, calculadas segundo se indica nos apartados seguintes e de conformidade coa normativa reguladora do Imposto sobre a Renda das Persoas Físicas (IRPF). Computarase o exercicio 2014. 2. Para a determinación da renda dos membros computables que presentasen declaración polo IRPF, procederase do modo seguinte: a) Sumarase a base impoñíbel xeral coa base impoñíbel do aforro, excluíndo todos os saldos netos negativos de ganancias e perdas patrimoniais correspondentes a exercicios anteriores a 2013 e o saldo neto negativo de rendementos do capital mobiliario de 2010 a 2013 a integrar na base impoñíbel do aforro. b) Deste resultado restarase a cota resultante da autoliquidación. 3. Para a determinación da renda dos demais membros computables que obteñan ingresos propios e non presentasen declaración de IRPF seguirase o procedemento descrito na letra a) anterior e do resultado obtido restaranse os pagamentos a conta efectuados. 4. No caso de se ter establecida pensión de alimentos en favor de fillos e fillas integrantes da unidade familiar, a contía efectivamente percibida da mesma no ano 2014 incluirase no cómputo na renda familiar. 5. A renda familiar determinada segundo os números anteriores dividirase entre o número de integrantes da unidade familiar. O Servizo Municipal de Educación comunicará ao prestador do servizo a porcentaxe a recadar de cada beneficiario de bolsa parcial. 4
Página 5 de 6 3.- Dereitos do prestador do servizo: a) O concello entregará ao prestador do servizo, con antelación abondo ao comezo da viaxe a USA, a relación de participantes seleccionados. b) O prestador percibirá do Concello o custe íntegro das prazas con bolsa total e o 90% do custe das prazas con bolsa parcial. Para tal efecto terase en conta a compensación polo exceso recadado por parte do prestador do servizo, ao que se fai referencia no apartado 2.r) [achega das familias]. Así, no caso dunha praza con dereito a bolsa parcial do 70% o prestador percibirá do beneficiario da praza o 30% do seu custe total [achega das familias] pero na primeira factura que emita deberá descontarse o 20% percibido en exceso. Quedando para si o 10 % da achega das familias. O custe da praza será o resultado de dividir o prezo de adxudicación do contrato entre 50 (número de prazas ofertadas). 4.- Recursos humanos do prestador do servizo. a) O prestador do servizo incrementará ou diminuirá o persoal necesario para a correcta prestación do servizo, adoptando medidas que favorezan a estabilidade no emprego e asumindo os gastos derivados da súa contratación e mantemento. b) O prestador do servizo obrígase a proporcionar ao persoal empregado unha formación permanente e adecuada ao eficaz desempeño das tarefas encomendadas. c) O prestador do servizo designará un responsable do programa que será o interlocutor do Concello. d) O persoal a empregar estará capacitado parar atender con amabilidade, paciencia, educación e o debido respecto e dilixencia ao participante no programa, ás súas familias así como aos coordinadores en USA. Este persoal informará e asesorará de forma precisa e co debido coñecemento aos participantes e ás súas familias, para entre todos atopar a mellor solución ás situacións que se presenten. e) O prestador do servizo terá os dereitos e obrigacións inherentes á súa condición de empresario do persoal a empregar, de acordo co marco xurídico laboral e social aplicable, sen que en ningún caso o Concello da Coruña sexa responsable das relacións entre o contratista e os seus traballadores, aínda cando os despedimentos ou medidas que se adopten sexan consecuencia directa ou indirecta do incumprimento ou interpretación do contrato. 5
Página 6 de 6 f) O Concello non establecerá nin relación xurídica, nin laboral co persoal do prestador do servizo, debendo este informar os seus posibles traballadores sobre este punto e facéndoo constar expresamente en cada un dos contratos de persoal que subscriba. 6.- Protección de datos de carácter persoal O prestador do servizo e o persoal a empregar obríganse a garantir e gardar o máximo celo no cumprimento da Lei Orgánica 15/1999, de 13 de decembro de protección de datos de carácter persoal, e das súas normas de desenvolvemento, en particular respecto dos datos achegados durante o proceso de admisión de alumnos, así como outros que sexan confidenciais pola súa natureza. 6