CONCELLO DE VALDOVIÑO. XVII FESTIVAL DE ENTROIDO O Concello de Valdoviño promove o XVII Festival de Entroido que se celebrará o sábado 4 de marzo no Concello de Valdoviño. BASES QUE REXERÁN NO XVII FESTIVAL DO ENTROIDO 2017 NO CONCELLO DE VALDOVIÑO 1.- Poderán participar no XVII Festival de Entroido do Concello de Valdoviño as entidades legalmente constituídas e/ou grupos ocasionais que cumpran as condicións establecidas nas seguintes bases. En todo caso nomearase un representante debidamente autorizado para actuar en nome do grupo. 2.- Poderán participar no festival todas as persoas interesadas nas seguintes categorías : A) COMPARSA ADULTOS : considerarase comparsa o grupo de persoas integrado por un número igual ou superior a dez compoñentes debidamente disfrazados e gardando unha unidade temática na súa vestimenta e actuación. Poden optar a axuda económica por inscrición e por concursaren. B) COMPARSA INFANTIL: agrupacións formadas por un número igual ou superior a dez persoas nas que polo menos o 50% dos seus compoñentes sexan menores de 18 anos. As comparsas infantís precisarán nomear a un representante maior de idade para poderen participar. As comparsas infantís rexeranse polas mesmas bases que todas as demais podendo optar á axuda económica por inscrición, porén, non poden optar á axuda por concursaren.
3.- O Concello de Valdoviño destina a cantidade máxima de 3.300,00 en calidade de axudas para distribuír entre as comparsas participantes que teñan feito previamente inscrición atendendo ao escrito nas presentes BASES que se imputará á partida orzamentaria 338.48900 do orzamento do ano 2014, prorrogado para o ano 2017. 4.- En relación ao punto anterior, a cantidade destinada a axudas de participación a todas as comparsas admitidas será de 3.000,00 euros e a cantidade destinada a outras axudas puntuais a comparsas (mellor comparsa 2017 e mellor pasarrúas 2017) será de 300,00 euros. 5. No referido ás axudas por participación, a cantidade máxima que recibirá cada comparsa que reuna as condicións e requisitos esixidos nestas BASES será: de 300 00 euros. Os pagamentos faranse efectivos mediante transferencia bancaria na conta sinalada na documentación de inscrición na que deberá constar o IBAN sempre e cando se cumpran os requisitos establecidos. 6.- Con independencia da axuda económica de participación establécense estas outras que poderán ser acumulativas: -AXUDA PARA A MELLOR COMPARSA DA XVII EDICIÓN DO ENTROIDO DO CONCELLO DE VALDOVIÑO : 200,00 EUROS. -AXUDA PARA A COMPARSA QUE FAGA O MELLOR PASARRÚAS DA XVII EDICIÓN DO ENTROIDO DO CONCELLO DE VALDOVIÑO : 100,00 EUROS. Os pagamentos faranse efectivos mediante transferencia bancaria na conta sinalada na documentación de inscrición na que deberá constar o IBAN e sempre e cando se cumpran os requisitos establecidos. 7.- Para poder participar e optar as axudas económicas será imprescindible encher a solicitude de inscrición e os documentos anexos e entregalos na Casa da Cultura do Concello nas seguintes datas e horarios : do 13 ao 17 de febreiro e do 20 ao 24 de febreiro polas mañás de 10,00 a 13,00. Pola tarde o martes 14 e o martes 21 de
febrero de 15,00 a 17,00 horas. NON SE RECOLLERÁN INSCRICIÓNS FÓRA DOS HORARIOS ESTABLECIDOS. 8.- Cada comparsa entregará na Casa de Cultura copia das cancións ou guión das parodias a interpretar no momento de facer a solicitude de participación. TODA A DOCUMENTACIÓN A PRESENTAR RECOLLERASE XUNTA. 9.- O Concello de Valdoviño facilitará copia das cancións a interpretar aos membros do xurado e a aquelas persoas que as precisen para o correcto desenvolvemento do evento. O Concello non terá copias a disposición do público, non obstante, serán as propias comparsas as que libremente decidan distribuír a letra das súas cancións entre os asistentes ao festival. Dado o carácter humorístico desta festa tradicional, o Concello de Valdoviño non asumirá responsabilidade algunha acerca das letras, interpretacións e disfraces das comparsas e entroidos participantes. 10.- O modelo de instancia e Bases de inscrición facilitaranse na Casa da Cultura e estará dispoñible na páxina web do Concello. 11 A cantidade máxima de comparsas que se admitirán a participar nesta edición do Entroido será de 10. Terán preferencia sobre calquera outra con independencia da data de presentación de solicitude dentro dos prazos establecidos, as comparsas formadas por veciños de Valdoviño ; para todas as demais primará a orde de inscrición. O venres 24 de febreiro á partir das 13,00 horas confirmarase ao responsable de cada comparsa acerca da súa participación na XVII Edición do Entroido do Concello de Valdoviño. 12- Cada comparsa deberá interpretar ante o público nas instalacións destinadas ao evento un máximo de dúas cancións ou de dúas parodias, ou ben, dunha parodia e dunha canción. Polo menos unha delas terá que estar escrita e ser interpretada en lingua galega, e un dos temas deberá obrigatoriamente versar sobre Valdoviño. As comparsas que necesiten música deberán facilitala ao Dpto. de Cultura en dispositivo
CD ou USB o mesmo día do festival. As comparsas que vaian a realizar parodia ou canción a modo de presentación deberán indícalo na inscrición. 13.- O tempo máximo de posta en escena para cada comparsa será de 10 minutos. As comparsas que superen o tempo regulamentariamente establecido e permanezan no escenario despois de seren avisadas, poderán ser penalizadas polo xurado. 14.- O xurado estará integrado por un representante de cada unha das comparsas que poderá votar a todas menos a aquela que representa. O día do festival presentarase ante o persoal da Casa da Cultura antes de que comece o pasarrúas para que se lle explique o sistema de puntuación. O representante elixido como xurado terá o obriga de permanecer no lugar habilitado para tal fin e de visionar todas as actuacións. O abandono por parte da persoa do xurado sen previo aviso á organización e sen causa xustificada significará a descualificación da comparsa á que representa ; asimesmo, non poderá participar no pasarrúas como integrante da comparsa que representa. Outros imprevistos serán solucionados atendendo ao punto 18. En caso de empate nos premios, a cantidade indicada repartirase a partes iguais entre as comparsas obxecto do mesmo. Como criterios de valoración o xurado terá en conta a orixinalidade e vistosidade do disfrace, a posta en escena, as letras das cancións ou parodias, a simpatía e a animación de rúa que realice o grupo participante. A resolución do concurso terá lugar o mesmo día 4 de marzo. A comparsa gañadora do primeiro posto repetirá a interpretación, poñendo deste modo fin ao festival. O Concello de Valdoviño non se responsabiliza das votacións emitidas polo xurado. Calquera interesado poderá consultar a táboa de puntuación emitida por cada un dos membros do xurado. 15.- As comparsas inscritas asumen tamén o compromiso de desfilaren en pasarrúas e facendo a animación propia destas festas tradicionais. Con tal motivo, os integrantes das comparsas participantes deberán estar ás 17,00 horas no aparcadoiro que está situado detrás do edificio do Concello de Valdoviño para, atendendo ás indicacións da organización, situarse co tempo suficiente na rúa Imeldo Corral para iniciar o desfile ás
17,30 horas. O percorrido comprenderá o seguinte tramo : saída dende a rúa Imeldo Corral situada ao lado do edificio do Concello desfilando pola estrada principal ata chegar á Casa de Cultura. 16.- A orde de actuación das comparsas e de desfile no pasarrúas corresponderase coa orde de inscrición. O Concello de Valdoviño resérvase o dereito de anulación do desfile por inclemencias do tempo. Neste suposto o importe da axuda destinada á comparsa que faga o mellor pasarrúas pasará a definirse como axuda para a segunda mellor comparsa da XVII edición do Entroido do Concello de Valdoviño. No caso de anulación do pasarrúas o festival comezará ás 17,30 horas. 17.- Durante a celebración deste evento prégase evitar o suministro e consumo de bebidas alcohólicas nos espazos destinados a este fin. 18.- Se coa finalidade de mellorar a organización e desenvolvemento dos actos programados se considerase conveniente introducir modificacións ao aquí fixado, poderá facerse por parte dos responsables da organización da actividade. Ademais, todos os integrantes das comparsas quedarán obrigados a atender as recomendacións que lles indiquen os traballadores dos corpos de seguridade. O incumprimento dará lugar á descualificación automática da comparsa participante. O Concello de Valdoviño non se fai responsable das consecuencias das actuacións de participantes que non respecten as normas e non cumpran o estipulado nas bases e tampouco se fai responsable das accións realizadas por grupos ou persoas disfrazadas non inscritas no desenvolvemento da presente actividade. 19.- O día da celebración da actividade levantarase acta sobre o acontecido no evento e posteriormente emitirase o informe correspondente para poder proceder cos pagamentos que cumpridamente se deban de facer atendendo ao estipulado nas presentes Bases.
20.- A inscrición no concurso enténdese como aceptación plena das Bases fixadas para o mesmo sen que se poidan formular reclamacións de ningunha clase e por ningún concepto contra o aquí regulamentado. O incumprimento dará lugar á descualificación automática da comparsa participante. Non serán admitidos comportamentos, ilegais, vexatorios ou de mal gusto que excedan o espírito crítico, satírico e lúdico do Entroido. 21.- Como anexo a estas bases figura a documentación para a inscrición. En todo o que non está previsto nestas bases terá de aplicación supletoria a Lei Xeral de Subvencións 38/2003. Valdoviño, 2 de febreiro de 2017. Alcalde, Alberto González Fernández.