Programa de Actividades IV ANIVERSARIO DECLARACIÓN RESERVA DE BIOSFERA Mariñas Coruñesas e Terras do Mandeo Concello de Curtis, maio de 2017
1.- ANTECEDENTES A candidatura da Reserva de Biosfera Mariñas Coruñesas e Terras do Mandeo foi promovida pola Asociación de Desenvolvemento Rural Mariñas-Betanzos, contando co apoio da Deputación da Coruña e a Xunta de Galicia, así como dos dezasete concellos que conforman este territorio. A aprobación definitiva desta Reserva de Biosfera pola UNESCO, tivo lugar na XXV Reunión do Consello Internacional de Coordinación do Programa MaB, celebrada en París o día 28 de maio de 2013. Mariñas Coruñesas e Terras do Mandeo abrangue un total de 116.724 hectáreas, que representan o 14,33% da superficie da provincia da Coruña, repartidas en 17 concellos. Con esta superficie é a segunda Reserva de Biosfera galega por orde de superficie, sendo a única na provincia da Coruña. Os Concellos que conforman a Reserva de Biosfera Mariñas Coruñesas e Terras do Mandeo son os seguintes: Abegondo, Aranga, Arteixo, Bergondo, Betanzos, Cambre, Carral, Coirós, Culleredo, Curtis, Irixoa, Miño, Oleiros, Oza -Cesuras, Paderne, Sada e Sobrado, cunha poboación de 190.708 habitantes (INE 2015).
2.- POR QUE UNHA RESERVA DE BIOSFERA? Porque cremos nun modelo territorial sostible, que contemple un desenvolvemento humano respectuoso co Medio Ambiente. Porque queremos fomentar un desenvolvemento económico e social, baseado no emprendemento, na economía verde e na mellora do sector agroforestal e do mar, así como favorecer a comercialización dos produtos e servizos turísticos. Porque estamos convencidos que é posible mellorar a calidade de vida das persoas que residen nos seus Concellos. Porque cremos na gobernanza como clave de éxito, implicando á sociedade nas decisións de futuro. Porque ademais cremos no coñecemento como pilar básico deste modelo, o cal atraerá investimentos e xerará novas oportunidades de emprego.
3.- ACTIVIDADES Para este ano 2017, os actos celebraranse no Concello de Curtis, a petición do seu representante na Xunta Directiva da Asociación Mariñas- Betanzos, celebrada o 23 de xaneiro de 2017. A continuación, resúmense unha serie de actividades para desenvolver na semana do 22 ao 28 de maio de 2017, con motivo do IV Aniversario do recoñecemento pola UNESCO deste territorio como Reserva Mundial da Biosfera. Trátase dun documento aberto a suxerencias e propostas: Xoves 25 de maio: Xornada no CEIDA sobre Reservas de Biosfera.
Xoves 25 de maio: Gala do Programa de Educación Ambiental da Reserva de Biosfera. Lugar: Casa da Cultura Pintor Llorens, Sada. Horario: 12.00 horas. Venres 26 de maio: Acto Institucional con motivo do IV Aniversario da Reserva de Biosfera Mariñas Coruñesas e Terras do Mandeo. Lugar: Exterior do Centro de Formación e Interpretación dos Valores Etnográficos do Mandeo.
Programa do Acto Institucional: 12.00 horas: Benvida e recepción dos asistentes. 12.30 horas: Discursos institucionais con motivo do IV Aniversario da declaración pola UNESCO como Reserva de Biosfera Mariñas Coruñesas e Terras do Mandeo. D. Javier Francisco Caínzos Vázquez. Alcalde de Curtis. Presentación do acto e benvida ás persoas asistentes. D. Xosé Lois Suárez Becerra. Concelleiro de Promoción Económica, Turismo e Medio Ambiente do Concello de Sada. D. Sergio Guevara Sada. Presidente da Rede de Comités Nacionais MaB e Reservas de Biosfera de Iberoamérica e Caribe (IberoMab, UNESCO). D. José A. Santiso Miramontes. Presidente do Consello de Dirección da Reserva de Biosfera Mariñas Coruñesas e Terras do Mandeo. Dna. Beatriz Mato Otero. Conselleira de Medio Ambiente e Ordenación do Territorio. 13.00 horas: Plantación simbólica de árbores autóctonas nas inmediacións do Centro Etnográfico.
13.30 horas: Inauguración de placa conmemorativa con motivo do IV Aniversario da Reserva de Biosfera, así como da exposición da Reserva de Biosfera no Centro Etnográfico de Teixeiro. 14.00 horas: Degustación de produtos locais do territorio da Reserva de Biosfera.
Domingo 28 de maio: Maratón Ornitolóxico da Reserva de Biosfera. A Maratón Ornitolóxica consiste nunha actividade lúdica na que se pretende, ao longo dunha xornada, ver, escoitar e identificar por equipos o maior número posible de especies de aves dentro dos límites da Reserva de Biosfera Mariñas Coruñesas e Terras do Mandeo. O obxectivo fundamental é achegar a ornitoloxía ao público en xeral, fornecendo o coñecemento das aves, aprendendo a respectalas e a gozar da súa presenza, así como poñer en valor os atractivos naturais desta Reserva de Biosfera, nunha iniciativa de divulgación ambiental. A iniciativa estará aberta ao público e a participación é de balde, estando as prazas limitadas e sendo de inscrición obrigatoria.
27 e 28 de maio: Lugar: Centro de Formación e Interpretación dos Valores Etnográficos do Mandeo. Exposición da Reserva de Biosfera Mariñas Coruñesas e Terras do Mandeo. Exposición sobre a biodiversidade presente no territorio da Reserva de Biosfera e as especies invasoras.
Ciclo de Cine Medioambiental: Proxección da película 'El secreto del bosque'. Ecoguinea, Waka Films, 2015, 45 minutos. Data: sábado 27 de maio de 2017. Lugar: Centro Etnográfico de Teixeiro. Hora: 12.00 horas. Sinopse: o bosque tropical de Guinea Ecuatorial é unha das poucas zonas de selva virxe que aínda quedan no mundo. Descoñecido e inexplorado, garda moitos segredos baixo o seu denso manto de vida. Un pequeno paraíso de biodiversidade, un conto africano que lanza unha clara mensaxe de conservación da natureza. Ver tráiler.
Proxección da película Green. Patrick Rouxel, 2009, 48 minutos. Data: domingo 28 de maio de 2017. Lugar: Centro Etnográfico de Teixeiro. Hora: 12.00 horas. Sinopse: Green narra as consecuencias da deforestación en Indonesia a través dos ollos dunha femia de orangután que foi rescatada en condicións extremas. A deforestación nos países do Sur se debe fundamentalmente ao cultivo e uso de aceite de palma, un aceite vexetal que se atopa en infinidad de produtos que consumimos na nosa vida cotiá. Este problema, ademais de producir grandes danos ambientais, está a causar a acelerada perda dunha das especies de primate máis cercana a nós, o orangután, que cada día se atopa máis preto da extinción. Ver trailer.
Presentación do Proxecto No seu lugar á comunidade educativa do territorio: Campaña de prevención e control de especies exóticas invasoras na Rede Galega de Reservas de Biosfera. As especies exóticas invasoras están consideradas na actualidade a segunda causa de perda de biodiversidade a nivel mundial, tras a destrución e fragmentación dos hábitats. Froito do actual e crecente proceso de globalización, o elevado tráfico (naval e terrestre, fundamentalmente) entre distintos países e continentes ten contribuído a aumentar de maneira significativa o fluxo de flora e fauna ao longo do planeta. No ámbito das Reservas de Biosfera galegas tamén está presente esta problemática, ameazando en ocasións á conservación da biodiversidade existente nestas áreas e con especial importancia nos espazos naturais protexidos que configuran as súas zonas núcleo. Adquire especial relevancia a flora exótica invasora vinculada a ambientes costeiros, xeralmente de elevada fraxilidade e cuxas especiais características ambientais facilitan a presenza de hábitats e especies de elevado interese que se poden ver afectados pola propagación de flora especialista.
A Campaña de Prevención e Control das Especies Exóticas Invasoras nas Reservas de Biosfera de Galicia contempla a realización dun Seminario formativo sobre exemplos en prevención e erradicación de especies invasoras, un programa de voluntariado para a erradicación destas especies e un Programa de participación nos centros educativos.
Programa de Actividades IV ANIVERSARIO DECLARACIÓN RESERVA DE BIOSFERA Mariñas Coruñesas e Terras do Mandeo Concello de Curtis, maio de 2017