RECOMENDACIÓNS PARA PREPARAR A ENTREVISTA DE TRABALLO Para axudarche a preparares unha entrevista de traballo, propoñémosche que teñas en conta algunhas recomendacións para ANTES DA ENTREVISTA DURANTE A ENTREVISTA DESPOIS DA ENTREVISTA PREPÁRATE ANTES DA ENTREVISTA 1 Coñécete a ti mesmo/a Reflexiona sobre os seguintes puntos: Analiza a túa memoria profesional. Reflexiona e extrae conclusións sobre a túa formación académica, a formación complementaria, a experiencia profesional... que posúes. Reflexiona sobre as túas competencias profesionais e como podes aplicalas ao posto de traballo. Reflexiona sobre as túas motivacións e o teu obxectivo profesional. Existen tres preguntas imprescindibles que, como mínimo, terás que te facer: Cales son as miñas competencias? Por que solicitei este posto de traballo e que podo achegarlle á empresa? Que factores poden diferenciarme do resto das persoas candidatas?
2 Infórmate sobre a empresa e o posto de traballo Podes consultar en distintas fontes: O sitio web da empresa na Internet (este é un paso fundamental). Persoas coñecidas que traballan ou traballaron na empresa, referencias na prensa, directorios de empresas... Se é posible, responde as seguintes preguntas: A que sector pertence a empresa? Cales son as súas liñas de negocio? A quen pertence? Canto máis saibas da empresa máis posibilidades tes de axustar as túas Canta xente ten empregada? respostas ás súas necesidades. Cal é a súa estrutura? Que proxectos ten en marcha? Pensa que a técnica da entrevista se basea na comunicación interpersoal. Cal é a súa política de persoal? Cal é a cultura que inculca na xente que ten empregada? Quen selecciona: persoal de RRHH da empresa, unha consultora..? Infórmate sobre o posto de traballo a que optas: De que posto se trata? Cales son as funcións máis importantes? Cal sería o perfil ideal do posto, que competencias técnicas e persoais require? Sería un traballo en equipo ou en solitario? Con que profesionais se relacionaría? Para obter información: - Analiza polo miúdo o anuncio de emprego ou prácticas - Reflexiona sobre as competencias clave do/a profesional que garante o éxito no posto.
Reflexiona sobre como usas a información sobre a linguaxe non-verbal! 3 Coida as habilidades de comunicación Estrutura a información obtida da empresa e do posto de emprego ou de prácticas. Selecciona e organiza a información e os datos sobre tí extraídos da túa memoria profesional consonte a súa relevancia cara á empresa e o posto concreto. Practica unha presentación profesional oral (cunha duración dun minuto aproximadamente). Practica a expresión oral de datos máis concretos sobre a túa formación e experiencia profesional (sinalando as competencias máis salientables do teu perfil). Practica a argumentación. Utiliza unha linguaxe non excesivamente técnica. Isto dependerá de quen che faga a entrevista, pero normalmente é persoal de RRHH que non domina a xerga específica do posto. Practica a linguaxe non-verbal (a túa xestualidade): o ton de voz, a mirada, a expresión facial e a postura deben potenciar o que se di, non desmentilo.. Ten en conta que: A linguaxe non-verbal e as habilidades de comunicación en xeral son temas complexos que non poden ser abordados a curto prazo. Podes atopar tanto na Internet como en soporte papel infinidade de guías e cursos máis ou menos exhaustivos que che axudan a manexar a linguaxe non-verbal. Se proxectas a imaxe de ter estudadas ao pé da letra as ditas normas, prodúcese un efecto contrario ao desexado: a persoa que entrevista rexeita a túa candidatura por non seres natural, non demostrares a túa personalidade e resultares artificial.
4 Reflexiona sobre a túa imaxe Elixe o teu vestiario con anterioridade á entrevista, xa que evita os imprevistos: - Pensa que tes que te sentir cómodo/a. - Elixe un vestiario conforme á cultura da empresa. Pensa que, en certa maneira, ti representas a empresa no teu posto. - Polo xeral, a roupa formal é a que menos riscos entraña, mais ten en conta que isto dependerá da filosofía da empresa, da clientela a que se dirixa, das liñas de negocio que desenvolva, da imaxe que ten a xente que traballa nela etc. - Exemplo: en ocasións, dependendo do tipo de empresa, unha imaxe audaz forma parte do perfil ideal do posto. - Polo xeral, tanto as maquillaxes como os peiteados e os perfumes deben axudar a proxectares unha imaxe agradable e coidada, non teñen que chamar a atención por eles mesmos. 5 Practica a entrevista, prepara as preguntas habituais e adiántate a outras posibles preguntas tendo en conta o teu currículo e o perfil do posto. Podes acudir ao persoal de orientación laboral para simulares unha entrevista de selección. Podes simular a entrevista coas túas amizades, gravala e logo vela para teres conciencia do que fas ben e o que deberías mellorar. Ten en conta que proxectares unha imaxe natural, espontánea e sincera é a mellor tarxeta de presentación, de nada serve o adestramento para a entrevista se logo proxectas a imaxe de que aprendiches a lección de memoria. Existe un repertorio de preguntas típicas sobre a formación, a experiencia, as motivacións, os intereses, o obxectivo profesional que se persegue e, ocasionalmente, sobre o tempo de lecer, que acostuman formularse nas entrevistas de traballo. Cómpre que as coñezas e que reflexiones sobre elas.
PREGUNTAS HABITUAIS Sobre a túa formación e cualificación Por que elixiches a túa carreira? Por que escolliches a túa especialidade? Que opinas da túa carreira? Que cambiarías? Que materias che interesaban máis? Cal é o título do teu proxecto fin de carreira? Por que o elixiches? Que formación complementaria relacionada co posto tes feita? Por que a fixeches? Estarías disposto/a a te seguir formando? Que coñecementos tes de informática? Que coñecementos tes de idiomas? Onde os adquiriches? Que nivel acadaches? Que competencias profesionais adquiriches no curso XXX? Sobre a túa personalidade Cales son os teus puntos fortes e febles? Fálame de ti Fálame dunha situación problemática coa cal te atopases e sobre como a resolviches Con que clase de compañeiros/as che gusta traballar? Prefires traballar con xente ou en solitario? Dime que persoa é un modelo que seguir para ti Como conseguiches os traballos anteriores? Que persoas che resultan máis difíciles para traballar con elas? Aceptarías un compañeiro ou unha compañeira como xefe/a? Aceptarías ser xefe/a dos teus compañeiros ou compañeiras?
Sobre a túa motivación e expectativas Por que te presentas a esta oferta? Coñeces esta empresa? Que agardas deste posto? Que é o que máis e o que menos che resulta motivador deste posto? Dime que persoa é un modelo que seguir para ti Como te ves dentro de catro anos? Que lle achegarías a este posto? Cal é a dúbida principal que tes con relación a este traballo? Canto queres gañar? Outras Estás noutros procesos de selección? Por que cres que debo seleccionarte? Queres preguntar algo?
DURANTE A ENTREVISTA Poden terse en conta dous tipos de recomendacións sobre as habilidades de comunicación DURANTE a entrevista de traballo: 1- Os que están ditados pola lóxica, o respecto ás persoas e o coidado das formas, isto é, o saber estar, que convén asimilares canto antes por motivos obvios e non só para atopar traballo, senón para mantelo. Por exemplo: Mirar a persoa que entrevista aos ollos. Non falar mal dos/as antigos/as compañeiros/as ou do persoal directivo da anterior empresa. Adoitar unha postura corporal correcta. Amosar atención cunha escoita activa e asentir cando se entende o que está a dicir a persoa que selecciona. Non interromper a persoa entrevistadora cando fala. Amosar unha actitude de empatía e agradable, usar o sorriso. Saudar e despedirse correctamente. Acudir puntual á cita, uns minutos antes de comezar. Usar o tratamento de vostede. Non fumar, nin levar goma de mascar ou caramelos (tanto antes coma durante a entrevista). Non cruzar os brazos debaixo do peito. Non levar postas as gafas de sol. Apagar o teléfono móbil. Ir amañado/a, mais con discreción (diríxete ao punto seguinte, onde se detalla máis polo miúdo este tema). Actúa con tranquilidade e naturalidade. Pensa sempre antes de falar ou actuar. Non sexas negativo/a nin proxectes unha imaxe dubitativa: buscan xente segura de si. Non xesticules moito. Non xogues con obxectos. Responde exclusivamente o que che pregunten
2- Os consellos que lles afectan ás condutas menos superficiais como, por exemplo, aquelas asociadas a situacións de tensión. Para controlar estas condutas, é necesario un tratamento específico que pode necesitar máis ou menos tempo segundo a súa natureza e grao. Por exemplo: Os tics, o tatexar, a suor O bloqueo mental A xesticulación excesiva Outras respostas indesexables ante unha situación de tensión: ton de voz agresivo ou demasiado feble, actitude defensiva etc. DESPOIS DA ENTREVISTA Reflexiona sobre as preguntas que che formularon. Anótaas e trata de te acordar das túas respostas, de como te sentiches, as reaccións do/a entrevistador/a, etc. De cales das túas respostas estás máis satisfeito/a? De cales das túas respostas estás menos satisfeito/a? De teres a oportunidade de volver a contestar como sería a túa resposta? Cres que deixaches pasar algún dato interesante que de poñelo de relevo gañaría puntos a túa candidatura? Que obstáculos atopaches á hora de responder?